Соёлын биет бус өвийн талаарх бүх нийтийн ойлголтыг нэмэгдүүлэх, хадгалж хамгаалах, түгээн дэлгэрүүлэх, өвлөн уламжлагчдыг алдаршуулах, ардын авьяастнуудыг дэмжих зорилгоор Дорноговь аймгийн ИТХ, “Саран хөхөө” театр, аймгийн Музей сургалт судалгааны төв, “Тэнгэрийн хутагт” бүлгэм хамтран “Их говийн манлай дуучин” шалгаруулах наадмыг ирэх есдүгээр сарын 26-нд Сайншанд хотноо зохион байгуулна.
Энэхүү наадамд зөвхөн Дорноговь аймгийн харьяат ардын авьяастнууд, өвлөн уламжлагчид оролцох бөгөөд оролцогчид нэгдүгээр шатанд өөрийн бэлдсэн уран бүтээл, хоёрдугаар шатанд нутгийн яруу найрагч, хөгжмийн зохиолчдын бүтээлээс сонгон дуулах юм.
Наадмын эхний гурван байрт шалгарсан ардын авьяастнууд болон үзэгчдийн нэрэмжит шагналаар нэг хүнийг тус тус шагнаж урамшуулах аж. Ташрамд, энэхүү уралдааныг анх 1994 онд Дорноговь аймгийн уугуул, Монгол Улсын гавьяат жүжигчин Л.Буянхишигтийн санаачилгаар Дорноговь аймагт зохион байгуулж байжээ. Жил бүр бус, тодорхой хугацааны давтамжтай зохион байгуулж байсан тус наадмаар авьяас билигтэй олон ардын авьяастан төрөн гарсан байдаг.
