“Карибын тэнгисийн дээрэмчид” цувралын зургаа дахь ангид ахмад Жек Спэрроугийн дүрээр Жонни Депп эргэн ирж магадгүй болжээ. Тодруулбал, цувралын продюсер Жерри Брукхаймер Жонни Депптэй энэ талаар яриа хэлцэл хийж байгаа бөгөөд шинэ киноны зохиол дээр мөн ажиллаж эхэлснийг мэдэгдсэн байна.
Жерри Брукхаймер “Дисней”-н “D23” арга хэмжээний үеэр “Deadline”-д ярихдаа, “Бид Жоннитой ярилцаж байгаа. Зохиол дээр ч ажиллаж байгаа” гэжээ. Гэхдээ Жонни Депп кинонд тоглохоор албан ёсоор гэрээ байгуулсан нь одоогоор батлагдаагүй байна.
Мэдээллүүдээр бол зургаа дахь кинонд шинэ гол дүр гарч ирэх бөгөөд Марго Роббиг тоглуулах талаар мөн ярилцаж буй аж. Жонни Депп эргэн ирсэн тохиолдолд Жек Спэрроугийн дүр өмнөх ангиудаас харьцангуй бага хэмжээний, туслах дүрээр орох юм байна.
Эргэн сануулахад, Жонни Депп 2003 онд гарсан “Pirates of the Caribbean: The Curse of the Black Pearl” кинонд анх ахмад Жек Спэрроугийн дүрийг бүтээсэн. Тус кино дэлхий даяар асар их амжилт олж, Жонни Деппийн бүтээсэн Жек Спэрроу Холливудын хамгийн танил дүрүүдийн нэг болсон юм. Дараа нь тэрбээр 2006, 2007, 2011, 2017 онд гарсан дөрвөн үргэлжлэлд дүрээ бүтээжээ. Цувралын эхний таван кино нийлээд дэлхийн прокатаас 4.5 тэрбум гаруй ам.долларын орлого олсон байна. Хамгийн сүүлд “Pirates of the Caribbean: Dead Men Tell No Tales” кино 2017 онд нээлтээ хийсэн бөгөөд түүнээс хойш франчайз шинэ анги бүтээгээгүй юм.
