Америкийн реппер Канье Уэст буюу Ye ОХУ-д тоглолт хийх товоо албан ёсоор зарлалаа. Тэрбээр Санкт-Петербург хотын “Газпром Арена” цэнгэлдэх хүрээлэнд ирэх аравдугаар сарын 10, 11-нд хоёр тоглолт хийхээр төлөвлөжээ. Уг мэдээллийг BBC болон бусад хөгжмийн хэвлэлүүд мэдээлсэн байна.
70 мянга орчим хүний багтаамжтай “Газпром Арена”-д болох тоглолтын тасалбарын үнэ 9,000-160,000 рубль буюу ойролцоогоор 106-1,885 ам.долларын хооронд байна. Тасалбар худалдаанд гарснаас хойш эрэлт өндөр байсан бөгөөд зарим ангиллын тасалбар богино хугацаанд дууссан байна.
Канье Уэстийн ОХУ-д хийх тоглолт нь 2022 онд ОХУ Украинд бүрэн хэмжээний дайн эхлүүлснээс хойш тус улсад тоглох хамгийн том барууны уран бүтээлчдийн нэг болох нөхцөл бүрдүүлж байна. Дайны дараа олон улсын томоохон уран бүтээлчид ОХУ-д тоглолт хийхээс татгалзаж, хөгжмийн олон компани тус улсын үйл ажиллагаагаа зогсоосон юм.
Ye-ийн ОХУ-д тоглолт хийх тухай яриа өмнө нь ч гарч байсан. Тэрбээр 2024 онд Москва хотод очиж, Оросын загвар зохион бүтээгч Гоша Рубчинскийн төрсөн өдрийн арга хэмжээнд оролцож байжээ.
