Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-ын хүрээнд Дархан-Уул аймгийн “Залуучууд” театрын уран бүтээлчид “Шидэт модны үр” хүүхдийн жүжгийг толилууллаа.
Тус уран бүтээл нь Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөн, “Ногоон Дархан-2032” хөтөлбөрийн хүрээнд хэрэгжүүлж байгаа бөгөөд хүүхэд, залуусын байгаль хамгаалах үйл хэрэгт оролцох оролцоог нэмэгдүүлэх, экологийн боловсрол олгох зорилготой юм.
Жүжгээр дамжуулан байгаль дэлхийгээ хайрлах, мод тарих дадлыг багаас нь төлөвшүүлэх нь цөлжилттэй тэмцэх, ногоон ирээдүйг бүтээхэд чиглэсэн тогтвортой хөгжлийн чухал хөрөнгө оруулалт болохыг хүүхэд багачууд болон олон нийтэд хүргэлээ.
Л.Хишигсүрэнгийн зохиолоор бүтсэн “Шидэт модны үр” жүжгийн уран бүтээлд театрын жүжигчид, дугуйлангийн сурагчид зэрэг 30 гаруй уран бүтээлч ажиллажээ. Уран бүтээлчид жүжгээр дамжуулан “Таван тивийн хүүхэд бүхэн тав таван мод таривал тив дэлхийдээ өгч буй бэлэг болж, цэнгэг агаарыг бүрдүүлнэ” хэмээх ногоон ирээдүйг өнөөдрөөс бүтээх уриалгыг олон улсын индрээс дэвшүүлсэн байна.
