“Fast & Furious” цувралын од Мишель Родригес жүжигчний замналаа эхлүүлж байх үеийнхээ талаар ярьж, шашны хатуу хүмүүжлийн улмаас Холливудын ертөнцийг хэрхэн хүлээж авч байсан тухайгаа хуваалцжээ.
Өдгөө 48 настай жүжигчин энэ тухайгаа “The Fast and the Furious” киноны 25 жилийн ойн тусгай үзлэгийн үеэр ярьсан байна. Тэрбээр багадаа Еховагийн гэрчүүдийн шашны орчинд өссөн бөгөөд тухайн үеийн хүмүүжил нь Холливудын амьдралтай эрс зөрчилдөж байжээ.
Родригесийн хэлснээр, жүжигчний карьераа эхлүүлсэн 20 гаруй насандаа тэрээр Холливудын алдар нэр, мөнгө, нэр хүндэд төдийлөн автаагүй байна. Учир нь түүний шашны хүмүүжилд энтертайнмент салбар нь өөр ертөнц мэт ойлгогддог байсан бөгөөд Холливудыг бүр “чөтгөрийн ертөнц” гэж төсөөлдөг байжээ.
Родригес өмнө нь ч шашны хатуу хүмүүжлийнхээ талаар илэн далангүй ярьж байсан. Тэрээр багадаа шашны үзэл суртал болон бодит амьдралын хооронд зөрчилдөж, өөрийгөө “давхар амьдрал”-аар амьдарч байгаа мэт мэдэрдэг байсан тухайгаа дурсаж байжээ. Тухайлбал, хүүхэд байхад нь “Дисней”-н кино үзэхийг хүртэл зөвшөөрдөггүй байсан гэнэ. Учир нь зарим кинонд гардаг ид шид, шулам зэрэг зүйлсийг шашны орчин нь зохисгүй гэж үздэг байжээ.
Гэвч эцэст нь Родригес өөрийн сонгосон замаар явж, Холливудын хамгийн танил тулаант киноны жүжигчдийн нэг болсон юм. Түүний “Fast & Furious”, “Avatar”, “Lost” зэрэг бүтээлүүд дэлхий даяар амжилт олсон билээ.
