Ховд аймгийн түүх, соёлын онцлох дурсгалын нэг бол Огторгуйн амны хүн чулуун хөшөө юм. Тус хөшөө нь Алтай сумын Барлаг багийн нутаг, Огторгуйн ам хэмээх газарт далайн түвшнээс дээш 1822 метрийн өндөрт оршдог.
Хүн чулууг 2х1.5 метрийн хэмжээтэй дөрвөлжин хашлагын дотор босгосон байна. Хөшөөний толгойн дүрслэл бүдгэрч, чулуу нь хагарчээ. Хөшөөний өндөр 81 см, өргөн 36 см, зузаан нь 13 см болохыг Түүхийн ухааны докторант Х.Бямбасүрэн “Ховд аймгийн нутаг дэвсгэр дэх хүн чулуун хөшөөд” хэмээх номдоо дурдсан байна. Тус хүн чулуун хөшөө нь он цагийн хувьд 6-8 дугаар зуун, Түрэгийн үед холбогдоно.
Сонирхуулахад, Алтай сум 3000 гаруй хүн амтай. Улаанбаатар хотоос 1400 гаруй км, Ховд аймгийн төвөөс 300 орчим км зайд оршдог.
