“Friends” цувралын Фиби Буффэйгийн дүрээрээ дэлхий даяар танигдсан жүжигчин Лиза Кудроу “Fresh Air with Terry Gross & Tonya Mosley” подкастад оролцох үеэрээ 1994-2004 онд үргэлжилсэн алдарт цувралынхаа талаар ярьжээ.
Тэрбээр “Friends”-ийнхээ жилүүдийн бүх үеийг хайрладаг. Харин шүтэн бишрэгчдийнхээ нэг л хүсэлтийг биелүүлэхээс татгалздаг гэдгээ хэлсэн байна. Тэр нь Фиби Буффэйгээс алдарт “Smelly Cat” дууг дуулуулах хүсэлт гэнэ.
Фибигийн зохиож, дуулдаг “Smelly Cat” нь “Friends” цувралын хамгийн мартагдашгүй хэсгүүдийн нэг болсон бөгөөд Лиза Кудроугийн дүртэй салшгүй холбоотой бүтээл юм.
Кудроу хэдийгээр уг дууг дахин дуулах сонирхолгүй байдаг ч “Friends”-ийн үеэ сэтгэл хангалуун дурсдаг хэвээр. Тэрбээр цувралын жүжигчидтэй өнгөрүүлсэн он жилүүд болон тэдний нөхөрлөлийг карьерынхаа онцгой хэсэг хэмээн үнэлдэг байна.
Түүний хувьд “Friends”-ийн хамгийн сайхан зүйлсийн нэг нь хамтран тоглосон жүжигчидтэйгээ бий болгосон харилцаа аж. Женнифер Энистон, Кортни Кокс, Мэтт ЛеБланк, Дэвид Швиммер, Мэттью Перри нартай хамт өнгөрүүлсэн он жилүүдээ Кудроу эерэгээр дурсжээ. “Бид хамтдаа хөгжилдөж чаддаг байсан. Бид бие биедээ үнэнч байж, харилцан хүндэлдэг байсан” хэмээн тэрбээр ярьжээ.
