Монгол Улсад амьдарч, бизнес эрхлэгч, Япон Улсын Томоко Икобүро философич С.Молор-Эрдэнэтэй хийсэн ярилцлагын нэвтрүүлгийн үеэрээ тусгаар улсын үндэсний түүх, өв соёлыг гутаан доромжилсон агуулга бүхий зүйл ярьсан нь олон нийтийн сүлжээнд ихээхэн шүүмжлэл дагуулаад буй.
Тэгвэл эл асуудалд УИХ-ын гишүүн Л.Мөнхбаясгалан “Томокод өгөх зөвлөгөө” гарчигтайгаар өөрийн сэтгэгдлээ цахим хуудсандаа нийтэлжээ.
Тэрбээр
“Томокод өгөх зөвлөгөө
Монгол улсад бэр орсон Томоко гэгч бүсгүй минь ээ… Та манай сайхан оронд ажиллаж амьдарч, ардчилсан нийгмийнх нь давуу байдлыг ашиглан олонд танигдаж сайн сайхан амьдарч байгаад бусад хүмүүсийн адил хүндэтгэж байлаа. Гэхдээ Монгол түмний эрхэмлэн хайрладаг үндэсний баатар, соёл, ёс заншил руу минь “хорон үгс” сумлах тоолонд чинь бусдын адил дургүй хүрсээр өнөөдрийг хүрэв. Үг хэлэх, үзэл бодлоо илэрхийлдэг эрх чөлөөг би сэтгүүлч хүний хувьд ямагт дээдлэдэг ч Томоко та энэ удаа улаан шугам давлаа. Эхэн үедээ би таныг санамсаргүй алдаа гаргадаг гэж бодож байсан ч үнэхээр санаатай хор гүйлгэж суудгийг чинь мэдэрсэн тул зөвлөгөө өгье.
“Усыг нь уувал ёсыг нь дага” гэж ухаант ард түмний минь үг байдгийг сануулья. Мэдэхгүй бол мэдэж ав!!! Олж унш ойлго!!! Ард түмнийг минь доромжлож, эх орныг минь басдаг хэлний мэдлэг чинь хангалттай хүрнэ!!! Бас аливаа юм хэм хэмжээтэйг сана!!! Таван литрийн саванд таван литр л ус багтдаг. Гаднаас ирсэн танд энэ улсад хийх юм хэмжээтэй!!! Хийх ёсгүй үйлээ хийж, хэлэх ёсгүй үгийг бүү хэл!!! “ Урт хэл хүзүү орооно” гэж айхтар сэрэмж үг бий.
Аль ч улсад нийгмийн хэм хэмжээ гэж байдаг. Монгол хүн бүрийн цусанд урсдаг, зүрхэнд лугшиж байдаг үндэсний бахархал, ёс заншил, түүх соёл руу минь бүү нулим!!! Аливаа ард түмнийг үгүй хийхэд түүхийг нь гуйвуулж, үгүйсгэдэг технологи байдгийг бид мэднэ. Эл үйлдэлд та оролцож , өдөөн хатгаж баясаж суугаа харагдсан. Танай улсад байдаг шиг манай улсад бас үндэсний үзэлтнүүд байдаг юм шүү !!! Монголын түүхэнд гаднаас ирж төр улсыг минь самаралцсан харь эм ганцаар тоологдоогүйг бид мэднэ. Тиймээс сэрэмж алдана гэж үгүй. Эцэст нь хэлэхэд агуу Чингис хааны өлгий нутагт амьдрах таны хугацаа дуусч байх шиг байна!!!
Бэрийн журамгүй, даруулгагүй, хадам талдаа тахимдуу бус хүндлэлгүй бэрийг төрхөмд нь буцааж орхидог заншилтай ард түмэн билээ бид.
Агуу түүхт, Их хааны нутагт хичээж амьдар , даруу төлөв яв Томоко!!!” гэсэн байна.
