Холливудын жүжигчин Гал Гадот “The Runner” киноны зураг авалтын үеэр Том Крузийн эрч хүч, тууштай байдлыг өөртөө үлгэр дуурайл болгож байсан тухайгаа ярьжээ.
Гал Гадот “Extra TV”-д өгсөн ярилцлагадаа шинэ киноныхоо зураг авалт түүний хувьд бие бялдрын хувьд нэлээд хүнд сорилт болсон талаар хуваалцсан байна. “The Runner” кинонд Гадотын бүтээсэн дүр хүүгээ аврахын тулд Лондон хотоор цаг хугацаатай уралдан гүйх шаардлагатай болдог аж. Иймээс жүжигчин зураг авалтын үеэр олон удаа, хурдтай гүйх шаардлагатай болсон байна.
Энэ үеэр тэрбээр алдарт жүжигчин Том Крузийг өөртөө урам зориг болгон боддог байсан хэмээн ярьжээ. Том Круз нь “Mission: Impossible” цуврал зэрэг кинонуудад эрсдэлтэй, биеийн хүч шаардсан хэсгүүдийг өөрөө гүйцэтгэдгээрээ алдартай билээ.
Гал Гадот зураг авалтын ачаалал өндөр байсан бөгөөд киноны ажлаа дуусгах үедээ таяг ашиглах шаардлагатай болсон тухайгаа ч мөн ярьсан байна.
