Азийн хөгжмийн ертөнцөд нэгэн томоохон үйл явдал болох гэж байна. Тодруулбал, анх удаа зохион байгуулагдах гэж буй “Eurovision Song Contest Asia” телевизийн дууны уралдааны зохион байгуулагчид Монгол Улсыг энэхүү шоуны 11 дэх оролцогч орноор албан ёсоор зарлалаа. Уралдаан энэ оны сүүлчээр Тайланд улсын Бангкок хотноо болох юм.
Монгол Улс дахь үндэсний шалгаруулалтыг “Mongolia’s Chosen One” гэж нэрлэхээр болжээ. Европын алдартай уралдааны форматыг Азийн бүс нутагт анх удаа нутагшуулан зохиож байгаа тул энэ нь уран бүтээлчдийн хувьд олон улсын тавцанд өөрсдийгөө тунхаглах хосгүй боломж гэдгийг дотоодын зохион байгуулагчид онцолж байна.
Уралдаанд Монгол, Тайланд, Өмнөд Солонгос, Малайз, Филиппин, Вьетнам, Камбож, Лаос, Бангладеш, Бутан, Непал зэрэг 11 орны дуучид эх орноо төлөөлөн өрсөлдөнө.
Уралдааны финалын тоглолтыг “Eurovision Song Contest” уралдааны албан ёсны YouTube сувгаар болон оролцогч орнуудын үндэсний төв телевизүүдээр шууд дамжуулан хүргэх аж.
