Монголын боловсролын түүхэнд хувь нэмрээ оруулсан багш Нямын Пүрэвжавын амьдрал, үйл хэрэг, түүхэн хувь заяаг өгүүлэх “Эгнэгт дуурсагдах хүмүүн” баримтат киног бүтээж байна.
Тус киноны сүүлийн зураг авалтыг наймдугаар сарын 11-12-нд Н.Пүрэвжавын төрсөн нутаг Дундговь аймгийн Сайнцагаан сумын Тэвш багийн Эрээн гүвээ хэмээх газар хийжээ.
Уран бүтээлчид түүний бага нас, өвөг дээдсийн нутаг ус, хошуу танхимд эрдэм сурахаар гэрээсээ мордож буй үйл явдлыг тухайн үеийн орчин нөхцөлд сэргээн дүрсэлсэн байна.
Н.Пүрэвжавын амьдрал, үйл хэргийг эрдэмтэн, түүхч, судлаачдын ярилцлага, архивын баримт материал, нутгийн иргэдийн дурсамж, аман түүхэд тулгуурлан олон талаас нь өгүүлэхээр бүтээж байна.
Баримтат кинонд Н.Пүрэвжавын аав Чойжингийн дүрд М.Эрдэнэбаяр, ээж Нямын дүрд Н.Энхжаргал, эмээ Уушийн дүрд ахмад багш М.Норовсүрэн тоглосон бол багшийн бага насны дүрийг нийслэлийн 48 дугаар сургуулийн сурагч Ц.Цэрэндагва бүтээжээ.
“Эгнэгт дуурсагдах хүмүүн” баримтат кино нь зөвхөн нэг хүний амьдрал, үйл хэргийг өгүүлэхээс гадна 100 жилийн өмнөх Монголын боловсролын хөгжил, багш хүний нийгэмд гүйцэтгэсэн үүрэг, хүүхэд залуусыг сурган хүмүүжүүлэхийн үнэ цэнийг харуулахыг зорьж байна.
Одоогоор киноны эвлүүлэг, дуу, дүрсний боловсруулалт болон хөгжмийн найруулгын ажил үргэлжилж байгаа бөгөөд нээлтийг есдүгээр сард Дундговь аймагт хийхээр төлөвлөжээ.
