Жүжигчин, найруулагч Мэгги Жилленхолл кино урлагийн салбарт эмэгтэй уран бүтээлчдэд тулгардаг хүйсийн тэгш бус байдал тогтолцооны асуудал хэвээр байгаа талаар байр сууриа илэрхийлжээ. Тэрбээр Италийн Венец хотноо болж буй 83 дахь удаагийн Венецийн олон улсын кино наадмын шүүгчдийн зөвлөлийн даргын хувиар хэвлэлийн бага хуралд оролцох үеэрээ энэ асуудлыг хөнджээ.
Мэгги Жилленхоллын хэлснээр, эмэгтэй найруулагчдын хувьд кино бүтээх санхүүжилт босгох нь эрэгтэй уран бүтээлчидтэй харьцуулахад илүү хүндрэлтэй байдаг аж. Мөн тэрбээр эмэгтэйчүүд өөрсдийн амьдралын онцлог туршлагаас сэдэвлэн өгүүлэхийг хүсдэг түүхүүдийг урлагийн өндөр үнэ цэнтэй бүтээл гэж тэр бүр үнэлдэггүй байж болох талаар ярьжээ.
Энэ жилийн Венецийн кино наадмын гол өрсөлдөөнд багтсан 21 бүтээлээс ердөө хоёр нь эмэгтэй найруулагчийнх байгаа нь шүүмжлэл дагуулж байгаа юм. Мэгги Жилленхолл энэхүү нөхцөл байдлыг кино урлагийн салбар дахь илүү өргөн хүрээний тогтолцооны асуудлын нэг илрэл гэж үзэж байгаагаа илэрхийлжээ.
Ташрамд дурдахад, Мэгги Жилленхолл өмнө нь анхны бүрэн хэмжээний найруулгын бүтээл болох “The Lost Daughter” киногоороо 2021 оны Венецийн кино наадмаас шилдэг зохиолын шагнал хүртэж байсан юм.
