Холливудын нэрт жүжигчин Том Круз адал явдалт киноны алдарт дүрүүдээсээ эрс өөр төрхөөр шинэ кино болох “Digger”-т тоглож, үзэгчидтэй уулзахаар болжээ.
Одоо 64 настай Том Круз тус кинонд Диггер Рокуэлл хэмээх дэлхийн хамгийн хүчирхэг хүмүүсийн нэг болох газрын тосны магнатын дүрийг бүтээж байна. Түүний дүр төрх өмнөх бүтээлүүдээс эрс өөр бөгөөд жүжигчин нүүр будалт, хиймэл нүүрний эффект ашиглан танигдахын аргагүй өөрчлөгджээ. Киноны нүүр будалт, үс засалтын багт “Оскар”-ын шагналт дизайнер Алессандро Бертолацци, мөн хиймэл нүүр будалтын нэрт мэргэжилтэн, “Оскар”-ын шагналт Казу Хиро ажиллажээ. “Digger” киног “Оскар”-ын шагналт найруулагч Алехандро Гонсалес Иньярриту найруулсан байна.
Тус кинонд Том Крузтай хамт Риз Ахмед, Жон Гудман, Сандра Хюллер, Жесси Племонс, Майкл Стулбарг, Эмма Д’Арси зэрэг жүжигчид тоглосон байна.
“Digger” киног бүхэлд нь “VistaVision” форматаар бүтээсэн бөгөөд АНУ-д 2026 оны аравдугаар сарын 2-нд кинотеатруудад нээхээр төлөвлөжээ.
