Өмнөд Солонгосын нэрт жүжигчин Шин Мин А шинэ дүрээрээ үзэгчидтэй уулзахаар болжээ. Тэрбээр алдарт веб роман, вебтүүнээс сэдэвлэсэн “The Remarried Empress” буюу “Дахин гэрлэсэн хатан хаан” цувралын гол дүр болох Навьер хатан хааны дүрийг бүтээж байна.
Тус бүтээл нь Дорнын эзэнт гүрний ухаалаг, эрхэмсэг хатан Навьерийн амьдралд өрнөх үйл явдлыг өгүүлдэг. Түүний нөхөр Эзэн хаан Совьешү өөр эмэгтэйд дурлаж, Навьерээс салах шийдвэр гаргаснаар хатан хааны амьдрал эрс өөрчлөгдөнө. Гэвч Навьер хувь заяандаа бууж өгөлгүй, нөхрөөсөө салсны дараа дахин гэрлэх эрх хүсэж, Баруун хаант улсын ханхүү Хайнритай шинэ амьдралаа эхлүүлэхээр шийддэг байна.
Шин Мин А энэ удаа өмнөх романтик болон инээдмийн дүрүүдээсээ эрс өөр, хүчирхэг бөгөөд сүр жавхлантай хатан хааны дүрийг бүтээж буй нь үзэгчдийн анхаарлыг татаж байна. Цувралын сурталчилгааны зургууд цацагдсанаар түүний тансаг хувцаслалт, хааны ордны уур амьсгал дахь шинэ төрх нь олны сонирхлыг хэдийнэ татжээ.
“The Remarried Empress” цувралд Шин Мин Атай хамт Өмнөд Солонгосын алдарт жүжигчид болох Жү Жи Хүн, И Жон Сок, И Сэ Ён нар тоглож байна.
“The Remarried Empress” цувралыг 2026 оны арваннэгдүгээр сарын 4-нөөс “Disney+” платформоор үзэгчдэд хүргэхээр төлөвлөжээ.
