Их Британийн нэрт жүжигчин, найруулагч Кеннет Брана “Harry Potter” киноны Гилдерой Локхартын дүрийг бүтээсэн дурсамжаасаа хуваалцаж, уг дүр түүнд онцгой сонирхолтой санагддаг байсан тухай ярьжээ.
Өдгөө 65 настай Кеннет Брана 2002 онд нээлтээ хийсэн “Harry Potter and the Chamber of Secrets” кинонд өөртөө хэт автсан, алдар нэрд дуртай профессор Гилдерой Локхартын дүрийг бүтээсэн билээ.
Тэрбээр “People” сэтгүүлд өгсөн ярилцлагадаа “Harry Potter” цуврал тухайн үедээ амжилттай болох нь тодорхой байсан ч олон арван жилийн дараа ч дэлхийн өнцөг булан бүрийн үзэгчдийн төсөөллийг татсаар байна гэж төсөөлөөгүй хэмээн хэлжээ.
Тэрбээр өөрийн бүтээсэн Гилдерой Локхартын дүрийн талаар ярихдаа “Өөрийнхөө тухай “Magical Me” нэртэй намтар хүртэл бичсэн, өөртөө маш их автсан энэ дүрийг бүтээх нь үнэхээр сонирхолтой байсан” хэмээн ярьжээ.
Кеннет Брана “Harry Potter” цувралын зөвхөн нэг ангид тоглосон ч энэхүү дүр түүний уран бүтээлийн замналд мартагдашгүй дурсамж үлдээсэн байна.
Мөн тэрбээр киноны зураг авалтын үеэр талийгаач жүжигчид болох Ричард Харрис, Алан Рикман, Мэгги Смит нартай хамтран ажилласан мөчөө онцгойлон дурсжээ. “Тэдэнтэй хамт ид шидийн мэт сайхан цагийг өнгөрүүлж, маш их зүйл сурсан” хэмээн Брана хэлсэн байна.
