“Оскар”-ын шагналт жүжигчин Сюзан Сарандон улс төрийн байр сууринаасаа болж сүүлийн үед киноны зарим дүр, төслөөс хасагдсан хэвээр байгаа талаар мэдэгджээ. 79 настай жүжигчин энэ тухайгаа 2026 оны Венецийн кино наадамд шинэ бүтээл болох “The Echo Chamber” киногоо танилцуулах үеэрээ ярьсан байна.
Сюзан Сарандон Палестиныг дэмжсэн байр сууриа олон нийтэд илэрхийлсний улмаас уран бүтээлийн ажил нь хязгаарлагдсан гэж үздэг бөгөөд зарим агентлагууд одоо ч түүнийг ажилд авахгүй байхыг уриалдаг хэмээн мэдэгджээ. Тэрбээр томоохон студийн бүтээлүүдэд ажиллахад хүндрэлтэй байгаа ч олон улсын хэмжээнд өөрийгөө илүү таатай хүлээн авдаг гэж онцолсон байна.
Сюзан Сарандон 2023 онд Нью-Йорк хотод болсон Палестиныг дэмжсэн жагсаалын үеэр хэлсэн үгийнхээ дараа олон нийтийн шүүмжлэлд өртөж, тухайн үед түүний төлөөлөгч агентлаг болох UTA түүнтэй хамтын ажиллагаагаа зогсоож байсан юм. Харин жүжигчин хожим нь хэлсэн үгийнхээ зарим хэсэгт уучлал хүсэж, тухайн үг хэллэгээ “ноцтой алдаа” байсан хэмээн мэдэгдэж байжээ.
Түүний шинэ кино “The Echo Chamber”-ийг Италийн найруулагч Андреа Паллаоро бүтээсэн бөгөөд Сарандон найруулагчийг өөртэй нь хамтран ажиллахгүй байх тухай анхааруулгыг үл тоомсорлон дүрд сонгосонд нь талархаж буйгаа илэрхийлжээ.
Жүжигчний хэлснээр, түүний улс төрийн байр суурийн талаар олон нийтийн ойлголт өөрчлөгдөж байгаа ч Холливудын томоохон студиуд болон кино үйлдвэрлэлийн зарим хэсэгт эсэргүүцэл, хязгаарлалт байсаар байгаа аж.
“The Echo Chamber” кино Венецийн кино наадамд нээлтээ хийсэн бөгөөд Италид есдүгээр сарын 10-наас үзэгчдийн хүртээл болохоор төлөвлөгджээ.
