ОХУ-ын нэрт дуучин Алла Пугачёва өөрийн олон хит дууны үгийг бичсэн яруу найрагч Илья Резник рүү хатуу үгтэй зурвас илгээсэн гэх мэдээлэл Оросын хэвлэлүүдээр цацагдаад байна.
Алла Пугачёва, Илья Резник нар Оросын хөгжмийн урлагийн түүхэнд хамгийн амжилттай хамтран ажилласан уран бүтээлчдийн тоонд зүй ёсоор багтдаг. Резник дуучны урын сангийн 70 гаруй дууны үгийг бичсэн бөгөөд тэд олон жилийн турш дотно нөхөрлөж, хамтран уран бүтээл туурвижээ.
Гэвч нэгэн цагт бие биедээ ойр дотно байсан хоёр уран бүтээлчийн харилцаа сүүлийн жилүүдэд хөндийрсөн бололтой.
Тэдний маргааны эхлэл 2024 онд Алла Пугачёвагийн 75 насны төрсөн өдөртэй холбоотой аж. Тухайн үед жүжигчин Станислав Садальскийн хүсэлтээр Илья Резник дуучинд зориулж төрсөн өдрийн мэндчилгээ бичсэн байна. Харин Садальский уг мэндчилгээг цахим хуудсандаа нийтэлжээ. Резникийн хэлснээр тэрбээр уг мэндчилгээг олон нийтэд зориулж бичээгүй бөгөөд цахим орчинд нийтлэгдэнэ гэж төсөөлөөгүй аж. Гэсэн ч нийтлэгдсэн мэндчилгээ олон нийтийн дунд янз бүрийн байр суурь, таамаг дагуулж, Резник болон Пугачёвагийн харилцаанд сөргөөр нөлөөлсөн тухай хэвлэлүүд мэдээлжээ.
