БНСУ-ын Бусан хотноо зохион байгуулагдаж буй 31 дэх удаагийн Бусаны олон улсын кино наадам аравдугаар сарын 6-нд эхэлсэн бөгөөд энэ сарын 15-нд өндөрлөнө. Энэ жилийн наадамд 59 орны нийт 247 киног албан ёсны хөтөлбөрт багтаажээ.
Энэ удаагийн наадам олон улсын кино үйлдвэрлэгчдийн холбоо (FIAPF)-ны олон улсын тэргүүлэх кино наадмын ангилалд багтсанаараа онцлог болж байна. Мөн наадмын үндсэн уралдааны шилдэг бүтээлд олгодог “Busan Award” шагналын эзэн кино “Оскар”-ын шилдэг олон улсын кино төрөлд нэр дэвшүүлэх эрхийн төлөө өрсөлдөх боломжтой болжээ.
Наадмын нээлтийн киногоор Өмнөд Солонгосын найруулагч Ким Жон Кваны “The Table: Day and Night” бүтээлийг сонгосон байна. Уг кино улирал солигдохын хэрээр нэгэн кафед уулзаж, хагацаж буй дөрвөн хосын түүхийг өгүүлдэг. Харин үндсэн уралдаанд Азийн кино урлагийн өнөөгийн чиг хандлагыг харуулсан 13 бүтээл өрсөлдөж байна.
Наадмын хүндэт зочдын дунд Оскарын шагналт жүжигчин Мишель Ёо, Мексикийн найруулагч Альфонсо Куарон, найруулагч, жүжигчин Мэгги Жилленхол, Францын жүжигчин Изабель Юппер болон Хятадын жүжигчин Фань Бинбин нар багтжээ. Мишель Ёо “Азийн оны шилдэг кино уран бүтээлч” шагналыг хүртсэн байна.
Кино үзвэрээс гадна уран бүтээлчидтэй уулзах, нээлттэй ярилцлага, мастер сургалт зэрэг арга хэмжээ зохион байгуулж байгаа бөгөөд наадмын эхний таван өдөрт эдгээр арга хэмжээнд 50 мянга гаруй хүн оролцжээ.
Бусаны олон улсын кино наадам нь Азийн кино урлагийг дэлхийн үзэгчдэд таниулах, олон улсын уран бүтээлчдийг холбох чухал талбарын нэг юм. Энэ жилийн наадмын хаалтын арга хэмжээ аравдугаар сарын 15-нд болж, үндсэн уралдааны шагналтнууд тодорно.
