Монголын хошин урлаг, тайз, дэлгэцийн бүтээлүүдээрээ үзэгчдийн танил болсон жүжигчин, Монгол Улсын Гавьяат жүжигчин Б.Баатархүүгийн төрсөн өдөр өнөөдөр тохиож байна.
Б.Баатархүү 1971 оны энэ өдөр буюу аравдугаар сарын 14-нд төрсөн бөгөөд Эрдэнэт хотод өсөж торнисон байна. 1993 онд Соёл урлагийн их сургуульд элссэнээр мэргэжлийн уран бүтээлч болох замналаа эхлүүлсэн юм.
Б.Баатархүүг үзэгчдэд таниулж, уран бүтээлийнх нь онцлогийг тодотгосон гол салбар бол хошин урлаг. Тэрбээр “X-ТҮЦ” продакшнаар олны танил болж, өдгөө “Эмоци” продакшнаар овоглож яваа.
Тэрбээр тайзны уран бүтээлээс гадна дэлгэцийн урлагт хүч сорьж, инээдмийн болон бусад төрлийн кинонд олон дүр бүтээсээр буй юм. Түүний оролцсон бүтээлүүдийн дунд “Сэргээш” цуврал, “Шарталт”, “Худалч залуу”, “Ганц бие бүсгүйчүүд”, “Хүүгүй ломбард”, “Омарын эрэл”, “Содура”, “Гурван найз” зэрэг олон ангит болон бүрэн хэмжээний олон кино бий.
Өдгөө түүнийг бүтээсэн дүрүүдээр нь Монголын үзэгчид эчнээ таниж, тэрбээр хошин урлагийн нэгэн үеийн төлөөлөл болон урлагийн салбарт байр сууриа хэдийнээ эзэлжээ.
