Бүгд Найрамдах Солонгос Улсад зохион байгуулагдсан 31 дэх удаагийн Бусаны олон улсын кино наадмаас найруулагч С.Бямбын “Зогсоол” уран сайхны кино “Vision of Jiseok Award”, “Hylife Vision Award”, “NETPAC Award”, “FIPRESCI Award” гэсэн нэр хүндтэй дөрвөн шагнал хүртэж, Монголын кино урлагийн олон улсын тавцан дахь амжилтыг бататгалаа.
“Зогсоол” уран сайхны кино нь “Гуру медиа” студи, Германы “Bucket GmbH” фильм, “АВО Films” болон “Номадиа пикчерс”-ын хамтын бүтээл бөгөөд зураг авалтыг Дундговь аймгийн Цагаандэлгэр суманд хийжээ.
Киноны үйл явдал ковид цар тахлын анхны тохиолдол Монголд бүртгэгдсэн тухайн цаг үед өрнөдөг. Алс бөглүү сумын төвийнхний бүх л амьдрал сумын цорын ганц шатахуун түгээх станцын эрхлэгч, өрх толгойлсон залуу бүсгүй Хандаагаас хамааралтай боловч энэ бүсгүйн амьдрал хэнээс, юунаас хамаарч байгааг киноны үйл явдлууд аажмаар нээн харуулах болно. Шатахуун тээврийн жолооч Сүмбэр цар тахлын ойрын хавьтагч болж, улмаар сумын цор ганц шатахуун түгээх станц дээр хөл хорионд орох болсноор киноны үйл явдал өрнөнө.
“Зогсоол” уран сайхны киног 2026 оны арваннэгдүгээр сард Монгол Улсад нээлтээ хийхээр төлөвлөөд байгаа аж.
