Колумбын дуучин Шакира “Las Mujeres Ya No Lloran World Tour” дэлхийн аялан тоглолтоороо 534 сая ам.долларын орлого олж, Латин уран бүтээлчдийн аялан тоглолтын түүхэнд шинэ амжилт тогтоолоо.
“Pollstar Boxoffice”-ийн мэдээллээр тус аялан тоглолт нийт 118 тоглолтын хүрээнд 534.38 сая ам.долларын орлого олж, 4.08 сая гаруй тасалбар борлуулсан байна. Ийнхүү Шакира Латин уран бүтээлчдийн аялан тоглолтын орлогоор дээд амжилт тогтоосон тухай хөгжмийн салбарын хэвлэлүүд мэдээлжээ.
Түүний аялан тоглолтын онцлох хэсгүүдийн нэг нь Испанийн Мадрид хотод болсон 13 тоглолт байв. Эдгээр тоглолтыг нийт 700 мянга гаруй хүн үзсэн бөгөөд арга хэмжээ нь хотын эдийн засагт 200 сая ам.доллараас дээш хэмжээний нөлөө үзүүлсэн гэж мэдээлсэн байна.
Шакирагийн “Las Mujeres Ya No Lloran World Tour” нь түүний ижил нэртэй цомгийг сурталчлахын зэрэгцээ дэлхийн олон орны үзэгчдэд хүрч, тасалбарын борлуулалт болон үзэгчдийн тоогоороо томоохон амжилтад хүрчээ.
Энэхүү амжилт нь Шакирагийн олон улсын хөгжмийн зах зээл дэх байр суурийг дахин бататгаад зогсохгүй Латин хөгжмийн уран бүтээлчдийн дэлхийн аялан тоглолтын цар хүрээ, эдийн засгийн нөлөө өсөн нэмэгдэж байгааг харуулж байна.
