Аравдугаар сарын 19-23-ны өдрүүдэд Улаанбаатар дахь Оросын шинжлэх ухаан, соёлын төвд Францын жүжгийн зохиолч, найруулагч Франсуаз До (Françoise Dô)-гийн удирдлага дор жүжгийн зохиол бичих мастер сургалт болж байна.
Франсуаз До нь Францын үндэсний драмын төв болох “Comédie de Saint-Étienne”-тэй хамтран ажилладаг Bleus et Ardoise театрын компанийн уран сайхны удирдагч бөгөөд “(LE) PLANCHE – Thinkfactory” цахим сэтгүүлийн редактор юм. Тэрбээр орчин үеийн жүжгийн зохиолын чиглэлээр туурвиж, хүмүүсийн харилцаа, нийгмийн зөрчил болон тайзны урлагаар хөндөн өгүүлэх олон талт сэдвийг уран бүтээлдээ тусгадаг.
Сургалтад Оросын шинжлэх ухаан, соёлын төвийн дэргэдэх залуучуудын “Про” театр болон Монголын Олон улсын театрын институтийн уран бүтээлчид хамрагдаж байна.
Тэд Францын жүжгийн зохиолчийн удирдлага дор уран бүтээлийн санаагаа боловсруулж, үйл явдлын өрнөлийг бүтээхээс эхлээд дүрүүдийн зан чанарыг тодорхойлох, зөрчлийг зангидах, харилцан яриаг боловсруулах хүртэлх жүжгийн зохиол туурвих үндсэн арга барилд суралцаж байна.
Төрсөн санаагаа хэрхэн бүрэн хэмжээний жүжгийн зохиол болгон хөгжүүлэх вэ? Үзэгчдэд үнэмшил төрүүлэх дүрүүдийг хэрхэн бүтээж, зохиогчийн санааг оновчтой илэрхийлэх үг хэллэгийг хэрхэн олох вэ? Дадлага ажилд тулгуурласан энэхүү сургалт нь оролцогчдод жүжгийн зохиолын зүй тогтлыг илүү гүнзгий ойлгож, тайзан дээр амилан үзэгчдэд хүрэх бүтээл хэрхэн төрдгийг танин мэдэх боломж олгож байна.
