Улсын хүүхэд залуучуудын театрын 75 жилийн ой энэ онд тохиож буй. Өнгөрсөн хугацаанд “Хайрыг хайрла”, “18 дахь хаврын хайр”, “Арслан хүлэгт баатар”, “Аддамсын гэр бүл”, “Ромео, Жульетта” гэхчилэн уран бүтээлүүдийг хүргэлээ.
Одоо Монголын түүхийн гүнээс сүндэрлэх их хувь заяа, итгэл үнэмшил, үнэнч сэтгэлийн тухай өгүүлэх “Тэнгэрийн элч Тэмүүжин” түүхэн жүжгээ энэ сарын сүүлээр нээх гэж байна.
Энэхүү бүтээл нь эр зориг, хайр сэтгэл, хагацал учрал, хувь заяаны ээдрээт зангилааг хөндөж, хүний сэтгэлийн гүн дэх үл тайлагдах ертөнцийг тайзнаа нээхээр зорьж буйгаараа онцлог юм.
Түүхэн сэдэвт жүжиг нь Монголын өв соёл, түүхэн хүмүүсийн амьдрал, тэдний үзэл бодол, итгэл үнэмшил, үнэнч нөхөрлөлийн үнэ цэнийг уран сайхны аргаар илэрхийлэхийг зорьжээ. Үйл явдлын өрнөлөөр дамжуулан хүний сонголт, хувь заяа, хайр сэтгэл, үнэнч байдлын тухай эргэцүүлэх боломжийг үзэгчдэд олгох юм.
Монголын түүх, өв уламжлалыг урлагийн хэлээр дамжуулан хүргэх энэхүү шинэ бүтээл тайзнаа амилснаар үзэгчдийг өнгөрсөн цаг үеийн үйл явдал, хүний сэтгэлийн нарийн зөрчилтэй танилцуулна.
“Тэнгэрийн элч Тэмүүжин” түүхэн жүжгийн ерөнхий продюсер, найруулагчаар Гавьяат жүжигчин Н.Ариунболд ажиллаж буй бөгөөд ирэх арваннэгдүгээр сарын 2-ноос үзэгчдийн хүртээл болгоно.
