Рок хөгжмийн домогт дуучин, “Bon Jovi” хамтлагийн гоцлол дуучин Жон Бон Жови дууны хөвчнийх нь асуудал хүндэрч, “Happy Birthday” буюу “Төрсөн өдрийн мэнд хүргэе” дууг ч дуулж чадахгүй болсон тухайгаа ярьжээ.
64 настай дуучин Австралийн “A Current Affair” нэвтрүүлэгт аравдугаар сарын 20-нд өгсөн ярилцлагадаа эрүүл мэндийн асуудалтайгаа хэрхэн тэмцэж, дуу хоолойгоо сэргээхийн тулд олон жилийн турш хичээл зүтгэл гаргасан тухайгаа хуваалцсан байна.
Жон Бон Жови 2022 онд гэмтэж, хатингаршсан дууны хөвчөө эмчлэх зорилгоор мэс засалд оржээ. Гэвч мэс заслын дараа дуу хоолойгоо бүрэн сэргээхэд төсөөлж байснаас нь хавьгүй урт хугацаа шаардагдсан байна. Тэрбээр мэргэжлийн дуу хоолойн дасгалжуулагч, эмчилгээний мэргэжилтнүүдтэй хамтран олон жилийн турш нөхөн сэргээх дасгал хийжээ.
“Би итгэл найдвараа алдаагүй. Гэхдээ эмч маань дөрвөн жил шаардагдана гэж хэлсэн бол би карьераа дуусгах талаар бодож ч магадгүй байсан. Энэ үйл явц үнэхээр удаан байсан. Ахиц дэвшил гарч байгааг мэдэрч байсан ч маш бага багаар урагшилж байлаа” хэмээн тэрбээр ярьжээ.
Жон Бон Жови мөн хамтлагийн гишүүдийнхээ дэмжлэгийг онцолжээ. Түүнийг эдгэрэх хугацаанд хамтлагийнхан нь хүлээж, эргэн тайзан дээр гарахыг нь тууштай дэмжсэн байна.
“Bon Jovi” хамтлаг 2027 онд “Forever Tour” аялан тоглолтоо үргэлжлүүлэхээр төлөвлөж байгаа бөгөөд шинэ тоглолтуудын товыг зарласан байна. Олон жилийн нөхөн сэргээх эмчилгээний дараа Жон Бон Жови тайзнаа эргэн ирж, хамтлагийнхаа алдартай дуунуудыг дахин амьдаар хүргэх боломжтой болсон нь түүний уран бүтээлийн замналын чухал үе болж байна.
