Холливудын нэрт жүжигчин Том Хэнкс 2027 оны намар “This World of Tomorrow” жүжгээр Бродвейн тайзнаа эргэн ирэхээр болжээ. Тэрбээр энэхүү цаг хугацаагаар аялах тухай романтик жүжгийн зохиолыг Жеймс Глоссмантай хамтран бичсэн байна.
Хоёр удаагийн “Оскар”-ын шагналт Том Хэнкс хамгийн сүүлд 2013 онд “Lucky Guy” жүжгээр Бродвейн тайзнаа тоглосноос хойш 14 жилийн дараа ийнхүү эргэн ирэх гэж байна. Тэрбээр шинэ бүтээлдээ “Тони” шагналт жүжигчин Келли О’Харатай хамтран тоглох бөгөөд найруулагчаар мөн “Тони” шагналын эзэн Кенни Леон ажиллана.
“This World of Tomorrow” жүжиг 2025 оны арваннэгдүгээр сард Нью-Йорк хотын “The Shed” театрын Гриффин театрт нээлтээ хийж, найман долоо хоногийн турш тасалбар нь бүрэн борлогдон тоглогджээ. Одоо уг бүтээлийг Бродвейн тайзнаа шилжүүлэн тоглуулахаар болсон бөгөөд тоглолт хязгаарлагдмал хугацаанд үргэлжлэх аж. Харин тоглолтын яг тов болон бусад жүжигчдийн нэрсийг хараахан зарлаагүй байна.
Жүжгийн үйл явдал XXI зууны сүүл үед амьдардаг, Берт Алленберри хэмээх ганцаардмал эрдэмтний тухай өгүүлнэ. Том Хэнксийн бүтээсэн Берт хайр дурлалыг эрэлхийлэн 1939 оны Нью-Йоркийн дэлхийн үзэсгэлэнгийн үе рүү цаг хугацаагаар аялж, тэнд Кармен хэмээх бүсгүйтэй учирдаг. Кармены дүрд Келли О’Хара тоглох бөгөөд тэдний хайр дурлалын түүхээр дамжуулан хүн хоорондын холбоо, үе үеийг холбох хайр сэтгэлийн хүчийг харуулах юм.
Уг жүжгийг Том Хэнксийн 2017 онд хэвлүүлсэн “Uncommon Type” богино өгүүллэгийн түүвэрт багтсан зохиолуудаас сэдэвлэн бүтээжээ.
