Реппер Эминемийн хуучин ажилтан Жозеф Стрэнж түүний нийтэд хараахан цацагдаагүй 20 гаруй дууг хууль бусаар хуулбарлан, худалдаж, интернэтэд задруулсан хэрэгт буруугаа хүлээжээ. Түүнд таван жил хүртэлх хугацаагаар хорих ял оноох боломжтой байна.
АНУ-ын Хууль зүйн яамны мэдээлснээр, 48 настай Жозеф Стрэнж 2007–2021 онд Эминемийн Мичиган мужийн Ферндейл хотод байрлах дуу бичлэгийн студид ажиллаж байжээ. Тэрбээр студийн хөгжмийн файлуудыг хадгалах компьютерын системийг хариуцдаг байсан тул репперийн хараахан нийтэд хүргэх зөвшөөрөл өгөөгүй уран бүтээлүүдэд нэвтрэх боломжтой байв.
Мөрдөн шалгах ажиллагаагаар Стрэнж 2024 оны долоодугаар сараас наймдугаар сарын хооронд Эминемийн нийтэд цацаагүй хөгжмийн файлуудыг хуулбарлан, заримыг нь бусдад худалдсан нь тогтоогджээ. Тэрбээр эдгээр бүтээлээс нийт 50 мянга орчим ам.долларын ашиг олсон бөгөөд задруулсан дуунууд интернэт дэх стриминг платформуудад тархаж, найман сая гаруй удаа хандалт авсан байна.
Энэ хэрэг 2025 оны нэгдүгээр сард Эминемийн баг нийтэд цацагдаагүй хөгжмүүд нь интернэтэд тархсаныг илрүүлж, Холбооны мөрдөх товчоонд (FBI) мэдэгдсэнээр шалгагдаж эхэлжээ. Улмаар эрх баригчид Стрэнжийн гэрт нэгжлэг хийх үеэр задруулсан дуунуудын хуулбар бүхий хатуу дискүүд, Эминемийн гараар бичсэн тэмдэглэл болон дууны үгийн нооргуудыг олсон байна.
Хууль зүйн яамны тооцоолсноор, уг үйлдлээс үүдсэн хохирол дор хаяж 750 мянган ам.долларт хүрчээ. Эминемийн хэвлэлийн төлөөлөгч уг үйлдэл нь уран бүтээлчийн олон жилийн хөдөлмөр, бүтээлийн нууцлал болон зохиогчийн эрхэд ноцтой хохирол учруулсан гэж мэдэгдсэн байна.
Жозеф Стрэнж зохиогчийн эрхийг эрүүгийн журмаар зөрчсөн хэрэгт буруугаа хүлээсэн бөгөөд 2027 оны нэгдүгээр сарын 27-нд ял сонсохоор товлогджээ. Түүнд таван жил хүртэлх хугацаагаар хорих ял оноох боломжтой юм.
