Дундговь аймгийн Мандалговь суманд болсон “Их говийн цуурай-2026” олон улсын хүүхдийн өв соёлын анхдугаар их наадамд Булган аймгийн Дашинчилэн сумын сурагчид амжилттай оролцож, хоёр мөнгө, хоёр хүрэл медаль хүртлээ.
Энэ сарын 23-25-нд болсон тус наадамд Монголын 20 гаруй аймаг, нийслэлийн хүүхэд багачууд оролцож, авьяас чадвараа сорин өрсөлджээ. Оролцогчид олон үндэстний дуу, бүжиг, морин хуур, хөгжим, ерөөл магтаал, эстрад хөгжим зэрэг төрлөөр уран бүтээлээ толилуулж, үндэсний болон олон үндэстний өв соёлыг сурталчлан таниулсан байна.
Булган аймгийн Дашинчилэн сумын сурагчид Соёлын төвийн дуу хөгжмийн багш, “Алтан гадас” одонт Л.Баатарсүрэнгийн удирдлагад цахилгаан хөгжмийн төрөлд амжилттай оролцож, “Оч” хамтлаг мөнгөн медаль, “Гэрэл” хамтлаг хүрэл медаль хүртэв. Мөн гоцлол бүжгийн “Олон үндэстний бүжиг” төрөлд өрсөлдсөн Б.Энхжаргал, Б.Юмдулам нар мөнгөн медалийн эзэн болжээ.
Булган аймгийн Засаг даргын “Булганы сэргэлт” үйл ажиллагааны хөтөлбөрийн “Амьд хөгжим” дэд хөтөлбөрөөр сумдын Соёлын төвийг хөгжмийн зэмсэг, хэрэгслээр хангах, хүүхэд залуусыг уралдаан тэмцээнд оролцоход нь дэмжлэг үзүүлж байна. Энэ хүрээнд Дашинчилэн сумын сурагчдыг тус наадамд оролцуулахад орон нутгаас 1,022,300 төгрөгийн санхүүгийн дэмжлэг үзүүлжээ.
