Испанийн “El Mundo” агентлагийн нийтлэлийг орчуулан хүргэж байна. Лондоны Олимп эхлэхэд ердөө гурван хоног үлдлээ. Иймээс Лондоны Олимпийг зохион байгуулах хорооны дарга лорд Себастян Коугийн ажил улам л ундарч байна.
Олимпийн аварга асан тэрбээр “Бүх зүйл графикийн дагуу явагдаж байна. Шийдэгдээгүй гэх асуудлууд нь томоохон үйл явдлын өмнө болдог энгийн л санаа зовоох зүйл” хэмээн мэдэгдэж байгаа юм.
Тэгвэл “Der Spiegel” сэтгүүл сүүлийн дугаараа Лондон 2012 Олимпийн наадмын бүтээгүй ажлуудад зориулжээ. Харин Коугийн хувьд британи хүний тайван зангаар тавьсан зорилгодоо хүрэхээр ажиллаж байгаа бөгөөд сэтгүүлчдэд бүх зүйлийг өөдрөгөөр харахыг уриалсан байна.
Нээлтийн өмнөх ачаалал
Олимпийг зохион байгуулах хорооныхон нээлтийн арга хэмжээний уран сайхны хэсэгт асуудал байгааг нуусангүй. Тэд Английн байгаль, У.Шекспирийн “Хар салхи” эмгэнэлт инээдмийн жүжгийн сэдвээр тоглолтынхоо сценарийг бэлтгэжээ. Үүнд нийт 33 сая евро төсөвлөсөн байна.
Арга хэмжээг удирдагч Дэнни Бойл зохион байгуулалтын асуудлаас болж “Olympic Broadcasting Service” компанийнхантай байнга маргаан дэгдээж байгаа гэнэ. Нээлтийн ажиллагааны давтлага хэтэрхий хожимдож эхэлснээс гадна үзэгчдийг шөнийн 12:30 цагаас өмнө метрондоо амжиж суулгахын тулд тоглолтыг 30 минутаар танасан нь гал дээр тос нэмжээ.
Дуусдаггүй бороо
Дөрөвхөн сарын өмнө Лондон хот хуурайшилтад бэлтгэж, усалгааны хоолой ашиглахыг хориглосон. Гэтэл гуравдугаар сарын сүүлчээс эхлэн бороо тасралтгүй орж, 2012 оны зун хагас зууны түүхэн дэх хамгийн чийглэг улирал болов. Тиймээс хэдэн долоо хоногийн турш цаг агаар сайхан байна гэсэн цаг уурчдын үгэнд хэн ч итгэхээ больжээ.
Английн зүүн өмнөд хэсэгт үер бууж, онцгой байдал зарласантай зэрэгцэн Олимпийн зохион байгуулах хороо хур тунадастай тэмцэх олон арга хэмжээ авахаас өөр аргагүйд хүрчээ. Бороо хур их орох нь хөнгөн атлетик, морин спорт гээд гадаа болох бүхий л тэмцээнүүдэд таагүйгээр нөлөөлнө. Тиймээс тус улс газар нутгаа бүхэлд нь бүрхэх дээвэр хийх хэрэгтэй хэмээн хошигноцгоож байна.
Аюулгүй байдалд анхаарал тавиагүй
G4S хамгаалалтын байгууллагын азгүйтэл Дэвид Камероны Засгийн газарт томоохон сургамж өгчээ. Дэлхийн 120 оронд 600 мянга гаруй ажилтантай, аюулгүй байдлын бүхэл бүтэн эзэнт гүрнийг тэргүүн Ник Баклс өмнө нь тооцоолж байсан 10.4 мянган ажилтныхаа ердөө гуравны нэгийг л наадмын үеэр гаргаж чадна хэмээн өнгөрсөн долоо хоногт парламентдаа мэдэгдсэн байна.
Цэргийнхэн хангамж муутай байна
Хамгаалалтын байгууллагынхан аюулгүй байдлыг хангаж чадахгүй нь ойлгомжтой болсон тул Британийн арми туслахаар болжээ. Хамгийн их хамгаалалттай дүүрэг болох “Fort Stratford” буюу Олимпийн паркийн ойролцоо 19 мянган цэрэг байрлана. Энэ нь Афганистанд ажиллаж буй Британийн армийнхнаас даруй хоёр дахин их тоо юм.
Эндхийн барилгын дээврүүд дээр зенит пуужин тавьж, агаарт “Lynx” нисдэг тэрэг, “Typhoon” сөнөөгч онгоц хөөргөн, Темза мөрнөөр “HMS Ocean” хөлөг онгоц явуулах юм байна. Ингэснээр Лондон бүслэгдсэн хотыг санагдуулам болжээ. Гэтэл түр лагерьт байрласан цэргийнхэн эзэнгүй барилгад сандал дээр хоноглож байгаа юм байна. Тиймээс тэд “Афганистанд байгаагаас дор байна” хэмээн ахуйн нөхцөл тааруу байгаа талаар байнга гомдоллох болжээ.
Замын түгжрэл ихсэв
Олимпийн наадам эхлээ ч үгүй байхад Лондон хот руу ордог замууд түгжирч эхэлжээ. Ялангуяа Олимпийн наадамд зориулан тусгайлан хаасан гудамжнуудын 150 км зам, ялгасан зурвасаас болж таксины жолооч нар бухимдацгааж, хөдөлгөөнийг хаана хэмээн айлгах боллоо. Метроны ачаалал II Елизавета хатан хааны ойн үеийнх шиг нэмэгдээгүй ч галт тэрэгний зарим хэсгийн хөдөлгөөн үе үе зогсож буй нь Лондоны дэд бүтэц хэрхэн хуучирсныг илтгэнэ.
Хотын захаас Стратфордын чиглэлийн цахилгаан галт тэрэг хол зайтай, дүүрэн хүнтэй ирсээр байна. Олимпийн наадмын үеэр энэ байдал үргэлжилбэл нэг сая зорчигчоо дийлэхгүй, метро дотроосоо ханзрах аюул нөмөрчээ.
Ажил хаялт ч үргэлжлэх нь
Эндхийн гаалийн ажилтнууд долоодугаар сарын 26-нд ажил хаялт зарлахаар болов. Тэд Лондоны нисэх онгоцны таван буудлын үйл ажиллагааг зогсоохоор төлөвлөсөн байна. Ялангуяа Хитроу нисэх онгоцны буудлын үйл ажиллагааг хоёр цагийн турш зогсоохоор шийджээ.
Гаалийн ажилтнууд цомхтгол, цалин хөлс зэрэг асуудлаас болж ийнхүү эсэргүүцлээ илэрхийлж буй аж. Түүнчлэн тээврийн ажилтнуудын мэргэжлийн холбооныхон наймдугаар сарын 6-8-ны өдрүүдэд төмөр замын шугам дээр ажил хаялт зарлахаа мэдэгджээ.
Бэкхемийн уур хилэн
Олимпийн хөлбөмбөгийн шигшээгийн дасгалжуулагч Стюарт Пирс бүрэлдэхүүндээ Дэвид Бэкхемийг багтаахгүй гэж мэдэгдсэнээс хойш Олимпийн наадмын таагүй асуудлууд өрнөсөн гэхэд болно. “Лос-Анжелес Галакси” багийн тоглогч, 37 настай Бэкхем төрсөн нутгийнхаа талбай дээр гарна хэмээн итгэж, Олимпийн наадмыг Лондонд зохиохын төлөө бүх хүчээ дайчилсан билээ. Гэвч Пирс түүний мөрөөдлийг үгүй хийж, шигшээгийн бүрэлдэхүүнд авсангүй.
Үүний дараа Дэвид, эхнэр Виктория Бэкхем нар маш их хилэгнэсэн билээ. Харин Лондоны Олимпийг зохион байгуулах хорооны дарга лорд Себастян Коу энэ талаар “Дасгалжуулагч хүндхэн шийдвэр гаргасан гэдгийг мэдэж байна. Гэхдээ би хөлбөмбөгийн хорхойтны хувьд Бэкхемийг талбай дээр гараасай гэж бусдын адил хүсч явсан” хэмээн мэдэгджээ.
Өглөөний сонин
