Нийслэлийн Соёлын төв өргөө нь уран бүтээлч, үзэгч, үйлчлүүлэгчдийн тав тухыг бий болгох зорилгоор байрандаа урсгал засварыг өөрсдийн дотоод нөөцөд тулгуурлан хийж, үзэгчдээ хүлээн авахад бэлэн болжээ.
Түүх сөхвөл, 1987 онд Зөвлөлтийн ард түмнээс бэлэг болгон энэ барилгыг барьсан бөгөөд анх “Шинжлэх ухаан техник соёлын ордон” гэсэн нэртэйгээр нээлтээ хийж байлаа. Ингэхдээ шинжлэх ухаан, урлаг соёлын олон байгууллага энд төвлөрөн, үйл ажиллагаа явуулж байв.
Соёлын төв өргөөний барилга А, Б, В, Г гэсэн дөрвөн үндсэн хэсгээс бүрддэг. А хэсэгт 1325 ба 400 хүний суудалтай хурлын болон концертын их, бага танхим, Ц.Намсрайжавын нэрэмжит улсын филармони, Монгол Улсын театрын музей, Морин хуурын чуулга,”Баянмонгол”, “Соёл-Эрдэнэ” чуулгууд байрладаг.
