Их Британийн алдарт дөрвөл болох домогт “The Beatles” хамтлагийн гишүүн тус бүрийн намтар түүхийг өгүүлсэн томоохон хэмжээний дөрвөн кино уран бүтээл 2028 онд нэг дор гарахаар болсныг өнгөрсөн долоо хоногт АНУ-ын Лас Вегас хотноо зохион байгуулагдсан “CinemaCon” үзэсгэлэн яармагийн үеэр “Sony Pictures” кино компанийн зүгээс албан ёсоор зарлалаа.
Бүрэн хэмжээний дөрвөн уран сайхны кино бүхий энэхүү нүсэр төслийг Их Британийн найруулагч Сэм Мендес найруулахаар болсон байна. Түүний хувьд Жеймс Бонд цувралын “Skyfall”, ”Spectre” гэсэн хоёр ангийг найруулснаас гадна 1999 онд “Америк гоо үзэсгэлэн”, 2019 онд дэлгэцнээ гарсан Дэлхийн нэгдүгээр дайны талаар өгүүлдэг “1917” гэх зэрэг чанартай, томоохон уран бүтээлүүдийг найруулж, түүний бүтээсэн уран бүтээлүүд “Оскар”-ын наадмаас нийт 12 шагнал хүртэж байв.
“CinemaCon” арга хэмжээний үеэр мөн “The Beatles” хамтлагийн гишүүдэд тоглох жүжигчдийг танилцуулсан байна. Тодруулбал, хамтлагийн гишүүн Пол Маккартнид “Гладиатор 2” киноны гол дүрд тоглосон Ирландын жүжигчин Пол Мескал, Жон Ленноны дүрд 2024 оны сүүлээр гарсан “Baby Girl” киногоороо шуугиан тариад буй Английн жүжигчин Харрис Диккинсон, Ринго Старрын дүрд “Dunkirk”, “Batman”, “Saltburn” зэрэг олон киноны дүрээрээ алдартай Ирландын жүжигчин Барри Кеоган, Жорж Харрисоны дүрд “Stranger Things” телевизийн цувралын дүрээрээ олон танигдсан, удахгүй гарах “Marve”l-ын “The Fantastic Four: First Steps” киноны гол дүрд тоглоод байгаа Английн жүжигчин Жозеф Куинн гэсэн энэ цаг үеийн залуухан од жүжигчдийг сонгон тоглуулахаар болжээ.
