Монголын уран бүтээлч Magnolian-ий “Indigo” дуу “Death stranding 2: On the beach” тоглоомын албан ёсны саундтрэкт багтаж, дэлхий дахинаа эгшиглэж байна.
Тоглоомын урлагийн нэрт найруулагч Хидео Кожима дахин нэгэн гайхалтай бүтээлээр эргэн ирлээ. “Death stranding 2: On the beach” бол “Kojima productions” студийн бүтээсэн “Death stranding” цувралын хоёрдугаар анги бөгөөд 2025 онд “PlayStation 5”-д зориулан гарч байгаа адал явдалт, шинжлэх ухааны уран зөгнөлт тоглоом юм.
“Death stranding” тоглоомын хөгжмийн гол онцлог нь дэлхийн өнцөг булан бүрийн уран бүтээлчдийг танилцуулдаг юм. Харин энэхүү алдарт, дэлхий дахинаа өндөр хүлээлт үүсгээд байгаа видео тоглоомын саундтрэк буюу дууны жагсаалтад Монгол уран бүтээлч Magnolian-ийн “Indigo” дуу багтаад буй. Уг аялгуу тоглоомын нам гүм үеэр эгшиглэж, тоглогчдын сэтгэлд уянгын, тайван өнгө аяс нэмдэг байна. “Indigo” дуу нь тоглоомын гол санаа болох “бид хоорондоо хэрхэн холбогддог вэ” гэх сэдвийг гүн гүнзгий илэрхийлдэг аж.
Түүнчлэн Magnolian-ийн “Woods”, ”Famous men”, “Rome” зэрэг уран бүтээл уг тоглоомд тоглогддог байна.
“Death stranding” цуврал нь хүн төрөлхтөн үхлийн дараа юу байдгийг олж мэдсэнээр амьдрал ба үхлийн тэнцвэр алдагдаж, задран бутарч, олон жил хөл хорионд амьдарсан ертөнцийн тухай өгүүлдэг. Энэ удаад тоглоомын үйл явдал Мексик болон Австралийн нутаг дэвсгэрт өрнөх юм. Эдгээр улс дэлбэрэлт, байгалийн гамшгаас үүдэн сүйдсэн байх бөгөөд тоглогч өөрийн болон бусад тоглогчийн зорчих зам, дэд бүтцийг босгоно.
