Холливуудын алдарт жүжигчин, дуучин, продюсер Жон Траволта өнөөдөр 72 нас хүрч байна.
Тэрбээр 1954 оны энэ өдөр буюу хоёрдугаар сарын 18-нд Нью-Жерси мужийн Инглвүүд хотод мэндэлжээ. Түүний аав нь машин засварын газар ажиллуулдаг, ээж нь жүжигчин, дуучин байсан учир хүүгээ багаас нь тоглолтондоо дагуулан явж, улмаар жүжгийн дугуйланд оруулсан гэдэг.
16 настайдаа “Bye bye Birdie” мюзиклд тоглосон нь түүний анхны цалинтай ажил байв. Тэр үед гурван сар ажиллаад 100 доллар авсан гэдэг. 1971 онд 17 настайдаа Жон Траволта сургуулиа хаяж, кино, дуу бүжгийн замыг эргэлт буцалтгүй сонгожээ.
1975-1979 онд тэрбээр “Welcome back” ситком цувралд тоглосноор хүмүүст танигдаж, уран бүтээлийн гараагаа амжилттай эхэлсэн ч түүний жүжигчний замнал 1980-аад онд уруудаж эхэлсэн. Харин “Pulp fiction” кинонд тоглосноор эргэн сэргэсэн юм.
Өнөөдрийг хүртэл 50 жилийн хугацаанд тэрбээр “Face/off”, “A civil action”, “The General’s daughter”, “Wild hogs”, “Hairspray” гэхчилэн 100 шахам бүрэн хэмжээний уран сайхны кинонд тогложээ. Тэрбээр “Оскар” болон BAFTA тэрүүтэй наадмуудад хэд хэдэн удаа нэр дэвшин өрсөлдөж, “Эмми” шагнал гардуулах ёслолын шилдгээр шалгарч, гурван ч удаа “Алтан бөмбөрцөг” хүртэж байв.
