Хөвсгөл аймгийн Төв музей 2023 оноос орчин үеийн технологи ашиглан виртуал орчин бүрдүүлэх ажлыг эхлүүлж, зарим үзмэрээ бодит орчноос гадна дижитал байдлаар үзэгчдэд хүргэж байна.
Дижитал музей гэдэг нь хиймэл оюун болон орчин үеийн технологийн тусламжтайгаар музейн үзмэр, бүтээлүүдийг хүүхэд, залуучуудад илүү ойр, бодитоор мэдрэх боломж олгож, соёлын өвийг сурталчлан түгээн дэлгэрүүлэх шинэ хэлбэр юм.
Өнөөдрийн байдлаар 50 гаруй үзмэрийг дижитал орчинд үзэх боломж бүрдүүлжээ.
Эдгээрээс Дархадын хотгорын үзэсгэлэнт байгаль, Хөвсгөл нуур, бөө мөргөлийн шүтлэг, өндөр Гонгор, дархад цагаан адуу, арслан зааны соёо, Уушгийн өврийн хүрлийн үеийн цогцолбор дурсгал, цаа зэрэг үзмэрийг дижитал орчинд үзэгчид илүү сонирхон үзжээ.
Хөвсгөл аймгийн Төв музей сан хөмрөгтөө 4000 гаруй үзмэр, эд өлгийн зүйлтэй бөгөөд үзүүллэгийн 3 танхимтай үйл ажиллагаагаа явуулж байна.
