Монгол Улсын Соёл, спорт, аялал жуулчлал, залуучуудын сайд Ж.Алдаржавхлан Бүгд Найрамдах Итали Улсад ажиллах үеэрээ Венец хотын Ка Фоскари их сургуульд Монгол, Италийн эрдэмтдийн хамтарсан “Марко Пологийн Монголын ертөнц” номын нээлтэд оролцов.
Энэхүү бүтээл нь XIII зууны алдарт аялагч, судлаач Марко Пологийн тэмдэглэлд дурдсан Монголын талаарх түүхэн мэдээллийг орчин үеийн судалгаатай уялдуулан шинэ өнцгөөс тайлбарласнаараа онцлог юм. Судлаачдын үзэж буйгаар тус ном Монголын эзэнт гүрэн, нүүдэлчдийн соёл иргэншил, дорнын худалдаа болон соёлын харилцааны талаарх олон улсын судалгаанд шинэ хувь нэмэр оруулж байна.
Нээлтийн үеэр Тизиана Липпело сайд Ж.Алдаржавхлан тэргүүтэй төлөөлөгчдийг хүлээн авч уулзан, Монгол-Италийн хамтын ажиллагааг соёл, боловсрол, шинжлэх ухааны чиглэлээр өргөжүүлэх асуудлаар санал солилцов.
Уулзалтын үеэр талууд Марко Пологийн аялал нь зөвхөн түүхэн дурсамж төдийгүй өнөө цагт хоёр орныг соёл, судалгаа, аялал жуулчлалаар холбох чухал гүүр болж байгааг онцлон тэмдэглэв. Мөн Монголын түүх, өв соёлыг олон улсад сурталчлах хамтарсан төсөл, судалгааг нэмэгдүүлэх чиглэлд хамтран ажиллахаа илэрхийлсэн талаар ССАЖЗЯ-наас мэдээлэв.
