2024 онд Парисын “Éditions Jentayu” хэвлэлийн газраас Р.Мөнхзулын орчуулгаар хэвлэсэн “Бөөгийн домог” романыг минь танилцуулах арга хэмжээнүүд Францын зарим муж, түүнчлэн Бельги, Швейцар улсуудад зохиогдсон билээ. Тэгвэл Швейцарийн Женев хотноо байрлах “Éditions des Syrtes” хэвлэлийн газар уг номыг өөрсдийн дизайнаар, шинээр хэвлэж гаргалаа.
Парисд хэвлэгдсэн хувилбар нь харьцангуй үнэтэй (26 евро) зарагдаж байсан бол Женевийн хэвлэлийн газар илүү өргөн зах зээлд, хэн бүхэнд хүртээмжтэй хэлбэрээр борлуулах юм.
“Syrtes” нь Александр Дюма, Теофиль Готье зэрэг франц зохиолчдын романуудаас гадна Италийн Габриель Д’Аннунцио, Английн Кэйт Шопен зэрэг зохиолчдын бүтээлийн эрхийг өмчилдөг, Орос болон Зүүн Европын утга зохиолыг өргөнөөр танилцуулсан, Европын зохиолчдоор дагнасан хэвлэлийн газар ажээ.
