Монгол Улсын Хөдөлмөрийн баатар, Төрийн шагналт, Ардын уран зохиолч, төр, нийгмийн зүтгэлтэн, их соён гэгээрүүлэгч, яруу найрагч Бавуугийн Лхагвасүрэн агсны хайрын шүлгүүд өнөөдөр ч залуучуудын хайрын элч болон уншигдсаар байна.
Түүний гэргий С.Баасан Б.Лхагвасүрэн агсны өөрт нь зориулж бичсэн хайрын шүлгийг ач хүү Х.Хасуйн хамт эмхэтгэн “Хайрын мадригал” номыг уншигчдын хүртээл болгожээ. Элн номын нээлт өчигдөр /2026.05.15/ 39 дэх удаагийн “Номын баяр”-ын үеэр боллоо.
Бавуугийн Лхагвасүрэн агсны ач хүү Х.Хасуй эл номын талаар “Номын хавтас нь зураач Анри Матиссын “Le Coeur” хэмээх бүтээл. Түүний уран бүтээлүүд 2025 оноос хойш бүх нийтийн эзэмшилд орсон байдаг учир номондоо ашиглалаа. “Мадригал” гэдэг нь Италиар хайрын богино шүлэг гэсэн үг. Махчилж орчуулбал “Эхийн бүүвэй” гэсэн утгатай. Мөн өвөө эмээд байнга анарын шүүс, анар авч өгдөг байсан учраас анар жимсний зураг, дүрслэлүүдийг шингээсэн” хэмээсэн юм.
