Холливуудын нэрт жүжигчин Дэнни Гловер (“Lethal Weapon” киноны Рожер Мөртоугийн дүрээр алдартай) өөрийгөө альцгеймерийн өвчтэй болсон тухай анх удаа олон нийтэд нээлттэй мэдэгдлээ. Тэрбээр энэ өвчний оношийг 2022 онд “Хүндэт Оскар” хүртсэнийхээ дараахан авсан бөгөөд сүүлийн хэдэн жилийн турш уг өвчинтэй тэмцэн амьдарч байгаа аж.
Дэнни Гловер энэ талаараа “Амьдралын минь төгсгөл гэж би бодохгүй байна. Надад хийх ажил бий. Амьдрал үргэлжилсээр байна” хэмээжээ. Тэрбээр одоогоор түүний хөдөлгөөн, яриа болон ой санамж нь тодорхой хэмжээнд удааширч эхэлснийг хүлээн зөвшөөрсөн ч өнөөдрийг хүртэл идэвхтэй амьдарч, олон нийтийн арга хэмжээнд оролцсоор байгаа гэдгээ онцолсон байна.
Өдгөө 79 настай Дэнни Гловер бараг 40 гаруй жилийн карьерынхаа хугацаанд 170 гаруй кино, телевизийн бүтээлд тоглосон. Түүний хамгийн алдартай бүтээлүүдэд “Lethal Weapon” цуврал, “The Color Purple”, “Places in the Heart”, “Predator 2” гэх зэрэг кинонууд багтдаг. Тэрбээр жүжиглэхээс гадна хүний эрх, нийгмийн шударга ёсны төлөө тууштай тэмцэгч гэдгээрээ танигдсан бөгөөд НҮБ-ын Хөгжлийн хөтөлбөр болон ЮНИСЕФ-ийн элчээр ажиллаж, ядуурал, ДОХ, хүний эрхийн асуудлаар олон улсын хэмжээнд идэвхтэй ажиллаж иржээ.
