Сэлэнгэ аймгийн Нэгдсэн музей сүүлийн дөрвөн жилд түүх, соёлын өвийг хадгалан хамгаалах, судлан шинжлэх үндсэн чиг үүргийнхээ зэрэгцээ үзүүллэг, үйлчилгээндээ шинэ технологи нэвтрүүлжээ.
Тус музей 2024 онд 1921 оны хувьсгалын үеийн Сэлэнгэ нутгийн түүх, тухайн үеийн түүхэн хүмүүс, үйл явдлыг танилцуулах “Анхны долоо” танхимыг шинээр байгуулсан байна. 2025 онд музейн үзмэр, түүх, соёлын өвийг цахим орчинд хүргэх “Виртуал музей”-г бий болгожээ. Ингэснээр музейн сан хөмрөг, үзмэрийн талаарх мэдээллийг цахимаар үзэх боломжтой болсон байна.
Мөн 2026 онд түүх, өв соёлыг он цаг, үзмэрийн үнэ цэнтэй уялдуулан шинэ хэлбэрээр дэглэсэн “XIII зуун” танхимыг нээжээ.
Цахим технологи ашиглан музейн үйлчилгээг хөгжүүлсэн ажлаараа “Мөнгөн мод-2025” наадмын “Соёлын дижитал шилдэг бүтээл” номинацын шагнал хүртсэн байна.
Түүнчлэн Сэлэнгэ аймгийн Нэгдсэн музей 2022 онд аймгийн “Тэргүүний байгууллага”, 2023 онд төрийн үйлчилгээний “Тэргүүний байгууллага”-аар шалгарч, 2024 онд “Музей-ногоон байгууламж, таатай орчин” уралдаанд тусгай байр эзэлжээ.
