“Оскар”-ын шагналт найруулагч Квентин Тарантиногийн Лос-Анжелес хотын Холливуд Хиллс дэх гэрт үл таних эрэгтэй зөвшөөрөлгүй нэвтрэхийг завдсан хэрэг гарч, цагдаагийн байгууллага мөрдөн шалгаж байна.
Лос-Анжелесийн цагдаагийн газар (LAPD) есдүгээр сарын 9-ний өдөр орон нутгийн цагаар 12:20 орчимд Вүүдроу Вилсон Драйвын 7400 дахь хэсэгт байрлах Тарантиногийн гэрийн орчимд сэжигтэй этгээд явж байгаа тухай дуудлага хүлээн авчээ. Цагдаа нарын мэдээлснээр сэжигтэн нь 35 орчим настай, туранхай биетэй эрэгтэй бөгөөд хар өнгийн урт ханцуйтай цамц, хар өмд өмссөн байжээ.
“Los Angeles Times”-ын мэдээлснээр тухайн үед байшинд хүмүүс байсан бөгөөд сэжигтэн гурван давхар байшингийн хоёрдугаар давхрын цонхоор нэвтрэхийг завдсан байна. Харин цагдаа нарыг хэргийн газарт очих үед тэр аль хэдийн зугтсан байжээ. Үүний дараа LAPD зөвшөөрөлгүй нэвтэрсэн тухай албан ёсны хэрэг бүртгэсэн байна.
Энэ нь найруулагчийн гэрт гарсан анхны халдлага биш юм. 2018 онд Тарантино шөнө гэртээ хоёр хулгайч нэвтэрснийг мэдэж, тэдэнтэй нүүр тулсан гэх мэдээлэл гарч байсан. Тухайн үед хулгайчид үнэт эдлэл болон бусад эд зүйл авч зугтсан гэж мэдээлж байжээ.
Одоогоор энэ удаагийн хэргийн мөрдөн шалгах ажиллагаа үргэлжилж байгаа бөгөөд сэжигтнийг баривчилсан талаар мэдээлэл гараагүй байна.
