Канадын дуучин The Weeknd буюу Абел Тесфайе, өмнө нь тайзны нэр болон уран бүтээлээсээ хөндийрөх тухай бодож байсан ч одоо карьераа үргэлжлүүлэхээр шийдсэнээ мэдэгджээ. Тэрбээр энэ тухайгаа “GQ Hong Kong” сэтгүүлд өгсөн ярилцлагадаа тайлбарласан байна.
The Weeknd 2025 онд тайзны нэрээ орхиж, цаашид өөрийн төрсөн нэр болох Абел Тесфайег ашиглах хүсэлтэйгээ ярьж байсан. Харин энэ удаа тэрээр уран бүтээлээ орхихгүй, харин тодорхой хугацаанд нэг төсөлд бүх анхаарлаа төвлөрүүлэхийн тулд завсарлага авах гэж буйгаа тайлбарлажээ.
Тэрбээр сүүлийн таван жилийн хугацаанд дөрвөн концепт цомог, олон тооны дууны клип, телевизийн цуврал, бүрэн хэмжээний кино бүтээхийн зэрэгцээ дэлхийн хэмжээний аялан тоглолтоо үргэлжлүүлсэн байна. Иймээс одоо хэсэг хугацаанд “ичээндээ орох” мэт нам гүм байж, дараагийн төсөлдөө төвлөрөх нь зүйтэй гэж үзжээ.
Одоогоор The Weeknd “After Hours til Dawn” дэлхийн аялан тоглолтоо үргэлжлүүлж байгаа бөгөөд дараагийн уран бүтээлүүддээ анхаарлаа хандуулахаар төлөвлөж байна.
