Холливудын жүжигчин Сильвестер Сталлоне карьерынхаа эхэн үеийг эргэн дурсаж, 30–35 орчим насандаа өөрийгөө бусдад батлах гэсэн хүсэл нь түүнийг ууртай, тогтворгүй хүн болгосон гэж ярьжээ.
Өдгөө 80 настай жүжигчин шинэ дурсамж ном “The Steps”-ээ сурталчлах үеэрээ “92NY”-д CBS-ийн “Sunday Morning” нэвтрүүлгийн хөтлөгч Трэйси Смиттэй ярилцаж, 50 гаруй жилийн уран бүтээлийн замналаа эргэн харсан байна. Сталлоне одоо өөрийгөө хэнд ч батлах шаардлагагүй болсон гэж хэлжээ.
Тэрбээр карьерынхаа эхэн үеийг дурсахдаа тухайн үедээ маш тогтворгүй, ууртай, “Би та нарт хэлсэн шүү дээ” гэсэн хандлагатай, өс хонзонтой байснаа хүлээн зөвшөөрсөн байна. Амжилтаа хүртэл бүрэн дүүрэн мэдэрч чадаагүй бөгөөд тэр үеэ эргэн бодоход аймшигтай байдаг хэмээн ярьжээ.
Сталлонег 30 настайд нь дэлхий дахинд алдаршуулсан бүтээл бол “Rocky” юм. Тэрбээр киноны зохиолыг өөрөө бичиж, гол дүр болох Рокки Балбоаг бүтээсэн бөгөөд уг кино “Оскар”-ын шилдэг кино шагнал хүртсэн. Харин Сталлоне шилдэг эрэгтэй жүжигчин болон шилдэг эх зохиол төрөлд “Оскар”-т нэр дэвшсэн юм.
Гэсэн хэдий ч ийм том амжилтад хүрсэн ч Сталлоне Холливудад өөрийн байр суурийг байнга батлах шаардлагатай мэт мэдэрдэг байжээ. Үүний улмаас амжилтаасаа баяр баясал авахад нь хүртэл хүндрэлтэй байсан гэж тэр тайлбарласан байна.
Ташрамд дурдахад, Сильвестер Сталлоны “Rocky” кино хэрхэн бүтээгдсэн түүхийг өгүүлэх “I Play Rocky” шинэ кино арваннэгдүгээр сард кинотеатруудаар нээлтээ хийх юм. Тус бүтээлд залуу Сталлонегийн дүрийг Энтони Ипполито бүтээж, гараар бичсэн “Rocky” зохиолоо кино болгохын төлөө Холливудад удаа дараа татгалзсан хариу авч байсан үеийг харуулах аж.
