Монгол Улсын Ардын жүжигчин, Зууны манлай эстрадын дуучин, поп дива Батмөнхийн Сарантуяагийн уламжлалт “Мөнгөн шөнө 2026” гала үдэш арванхоёрдугаар сарын 18-нд зохион байгуулагдахаар болжээ.
2013 оноос уламжлал болгон зохион байгуулж ирсэн “Мөнгөн шөнө” гала үдэш энэ жил ийнхүү эргэн ирж, үзэгч, сонсогчдодоо баярын уур амьсгал дүүрэн нэгэн үдшийг бэлэглэх гэж байна.
Монголын рок, поп хөгжмийн тайзнаа 40 жилийн турш уран бүтээлээ туурвиж буй Б.Сарантуяа нь хүчирхэг хоолой, өвөрмөц тайзны дүр төрх, олон үеийн сонсогчдын сэтгэлд хоногшсон уран бүтээлүүдээрээ танигдсан уран бүтээлч юм. Түүний “Хайрын бурхан”, “Аргагүй амраг”, “Сэтгэлийн жигүүр” зэрэг дуунууд Монголын нийтийн дуу хөгжмийн сор бүтээлүүдийн тоонд багтдаг.
Энэ жилийн “Мөнгөн шөнө 2026” гала үдэш Зайсан Хилл эвент холлд болох бөгөөд тансаг орчин, амьд хөгжим, баярын уур амьсгалыг хослуулсан арга хэмжээ байхаар зарлагджээ.
