УДЭТ-ын уран бүтээлчтд театрынхаа ууган зохиолч, их зохиолч Д.Нацагдоржийн амьдралаас сэдэвлэн бүтээсэн “Жаргаагүй нар” түүхэн, эмгэнэлт жүжгийг 2016 онд анхлан үзэгчдэд хүргэж байв. Эл жүжгийн зохиолыг Төрийн шагналт, Соёлын гавьяат зүтгэлтэн Ш.Гүрбазар бичиж, Урлагийн гавьяат зүтгэлтэн, УДЭТ-ын Ерөнхий найруулагч Ч.Түвшин найруулсан юм.
Тэгвэл их зохиолч Д.Нацагдоржийн мэндэлсний 120 жил, УДЭТ-ын түүхт 95 жилийн ойд зориулан тус уран бүтээлийг ирэх арваннэгдүгээр сарын 5-наас дахин олны хүртээл болгох гэж байна.
Монголын шинэ үеийн утга зохиолыг үндэслэгч, их зохиолч Д.Нацагдоржийн амьдрал, уран бүтээлээс сэдэвлэсэн энэхүү бүтээл нь нэгэн хүний хувь заяагаар дамжуулан цаг үеийн өнгө төрх, хүний сэтгэлийн эмзэглэл, амьдралын гашуун үнэнийг тайзнаа амилуулах бөгөөд гол дүрд Б.Шинэбаяр, бусад дүрд О.Хонгорзул, М.Тогтохжаргал, Т.Сэргэлэн, Ардын жүжигчин Б.Жаргалсайхан, Э.Идэрболд тэргүүтэй УДЭТ-ын уран бүтээлчид тоглоно.
