Ховд аймгийн Чандмань сумын Тахилт багийн Бүдүүн хэмээх газарт VI-VIII зууны Түрэгийн үед холбогдох хүн чулуун хөшөө бий. Саарал боржин чулуугаар урласан уг дурсгал нь тухайн үеийн хүмүүсийн дүр төрхийг чулуунд буулгаснаараа онцлог юм.
Бүдүүний хүн чулуун хөшөө далайн түвшнээс дээш 1650 метрийн өндөрт байрладаг. Хөшөөний өндөр 86 см, өргөн 51 см, зузаан 31 см бөгөөд хүний толгой, нүд, хамар, амыг тодорхой дүрслэн урлажээ.
Ховд аймгийн нутаг дэвсгэрт 60 гаруй хүн чулуун хөшөө байдаг. Эдгээр нь эртний нүүдэлчдийн түүх, соёл, урлахуйн уламжлалыг илтгэх археологийн дурсгалууд юм.
Бүдүүний хүн чулуун хөшөөг оршин буй газрынх нь нэрээр ийн нэрлэж ирсэн бөгөөд Чандмань сум Улаанбаатар хотоос 1500 орчим, Ховд аймгийн төвөөс 150 гаруй км зайд оршдог.
