“Тусгай салаа” олон ангит киноны Түвшингийн дүрээр Монголын үзэгчдийн сэтгэлд хоногшиж, улмаар дэлгэцийн урлагт өөрийн гэсэн өнгө төрхийг бий болгосон жүжигчин П.Баттөрийн төрсөн өдөр өнөөдөр тохиож байна.
П.Баттөрийн удамд урлагийн хүн байгаагүй ч тэрбээр жүжигчин болох хүсэл мөрөөдлөө дагаж, энэ мэргэжлийг эзэмшсэн тухайгаа дурдсан байдаг.
Олон нийтэд түүнийг жинхэнэ утгаар нь таниулсан дүр бол “Тусгай салаа” олон ангит киноны Түвшингийн дүр бөгөөд П.Баттөр “Тусгай салаа”-гийн дараа бусад кино, телевизийн бүтээлүүдэд ажиллаж, дүрийн цар хүрээгээ тэлсэн юм. Тэрбээр уран бүтээлийн замналаа “Хөх толбот хүмүүс”, “Гарал угсаа”, “Би эмэгтэй хүн”, “Донор”, “Single Ladies-2”, “Зангараг”, “Үргээлэг-2”, “Хөөрхөн шулам”, “Зүрхний хилэн”, “Буруу өрөг”, “Наран мандах нутаг”, “Онцгой эрх”, “Хэнд ч хэлээгүй нууц”, “Зангараг-2: Төгсгөл”, “Гүртэн”, “1242: Өрнөдийн босгон дээр” гэхчилэн түүхэн болон орчин үеийн сэдэьт дэлгэцийн уран бүтээлүүдээх үргэлжлүүлж байна.
Тайзны уран бүтээлийн хувьд тэрбээр 2008 оноос УДЭТ-т хэсэг хугацаанд ажиллаад, чөлөөт уран бүтээлч болох замыг сонгосон. Харин өнгөрсөн 2024 онд тэрбээр “Монгол” театрын бүтээл “Клеопатра“ жүжгийн Марк Антонигийн дүрээр тайзнаа гарсан юм.
