Монгол Улс, ОХУ-ын хооронд дипломат харилцаа тогтоосны түүхт 105 жилийн ойн хүрээнд Төв аймгийн “Монгол туургатан” театрын уран бүтээлчид хөрш зэргэлдээ Буриад Улсад айлчилж, уран бүтээлийн дээжээсээ өргөн барьжээ.
Бүгд Найрамдах Буриад Улсын П.И.Чайковскийн нэрэмжит Урлагийн коллежийн тайзнаа энэ сарын 2-ны өдөр Урлагийн гавьяат зүтгэлтэн П.Нямлхагвын цомнол, найруулагч Д.Цэрэнчимэд, хөгжмийн зохиолч Г.Энхтайван нарын хамтын бүтээл “Өнчин цагаан ботго” хөгжимт жүжгээ тус коллежийн авьяаслаг сурагчидтай хамтран үзэгчдийн хүртээл болгосон байна. Мөн арваннэгдүгээр сарын 3-нд “Мир” соёлын ордонд “Их хүндэтгэл” хамтарсан тоглолтоо үзэгчдэд хүргэжээ.
