БНСУ-ын жүжигчин Чан Гын Сок өндгөвчний хорт хавдар өвчтэй монгол охинд тусалсан талаар өнөөдөр “Yonhap news” агентлаг уламжлав. “Tree J Company” агентлагийн мэдээлснээр, жүжигчин залуу өвчтөний ар гэрийнхэн охиныхоо замын зардал болон эмчилгээний төлбөрийг төлж чадахгүйд хүрснийг сонсоод туслахаар шийджээ. Мөн тэрээр охиныг Солонгосын хамгийн сайн эмнэлэгт эмчлүүлэх нь чухал гэж үзсэн байна. Эдүгээ Солонгос улсад байгаа охин "Ирэх тавдугаар сарыг хүртэл эмчилгээнд хамрагдахаар болсон" хэмээн онцлоод, "Өвчний онош тогтоогдож, Монголд хагалгаанд ороод, маш хүнд байсан. Чаны тусламжтай дахин сэргэлээ” хэмээн хэлжээ.
Чан охинд хандан "Би хорт хавдрын эмчилгээ хийлгэх хэцүү гэдгийг мэднэ. Гэхдээ итгэл найдвараа алдалгүй, бууж өгөхгүй гэж найдаж байна" хэмээн хэлснийг компаниас нь уламжилсан байна. Жүжигчин залуу 2009 оноос хойш "Дэлхийн зөн" байгууллагын шугамаар 100 хүүхдэд тусламжийн гараа сунгажээ. Тэрбээр ирэх сарыг хүртэл Японы Токио, Фукуока болон Нагоягийн фенүүдтэйгээ уулзах юм байна. Э.ЭНХ-ЭРДЭНЭ
