Дэлхийн банкнаас зохион байгуулж буй “Урлагаар шинэчилэхүй” Монголын өв соёлыг таниулан сурталчлах уран бүтээлийн үзэсгэлэнд СУИС-ийн Д.Амгалангийн нэрэмжит Дүрслэх Дизайн Урлагийн Сургуулийн оюутнуудын бүтээлүүд шалгарчээ.
Дэлхийн банк нь 189 гишүүн оронтой, жилд хоёр орныг сонгож, урлаг соёлыг сурталчлах үйл ажиллагаа явуулдгийн нэг нь уран зургийн үзэсгэлэн юм. Энэ удаад АНУ-ын Вашингтон Ди Си хотын Дэлхийн банкны төв байранд 2019 оны 5 дугаар сарын 15-наас 6 дугаар сарын 07 хүртэл “Урлагаар шинэчлэхүй” Монголын өв соёлыг таниулах уран бүтээлийн үзэсгэлэнг зохион байгуулах бөгөөд үүнд оролцохоор Монголын олон арван уран бүтээлчид өөрсдийн бүтээлээ цахимаар илгээснээс СУИС-ийн Д.Амгалангийн нэрэмжит Дүрслэх Дизайн Урлагийн Сургуулийн 6 оюутны бүтээл шалгаруулалтад тэнцжээ. Энэ нь тус сургуулийн мэргэжлийн багш нарын заах арга, ур чадвар, төгсөгч оюутнуудын бүтээлийн чанар чансаа, сэдэв агуулга, гүйцэтгэл жилээс жилд өсөн хөгжиж байгаагийн тод илрэл болжээ.
Соёл урлагийн их сургуулийн уран зургийн багш Ө.Гандуламын удирдсан магистр Т.Соёл-Эрдэнэ “Амгалан сүм”, монгол зургийн багш Н.Нармандахын удирдсан магистр Б.Баярхүүгийн “Сахиус хөлөглөгч”, магистр А.Иснилийн “Галын тахилга”, магистр Г.Сандагдоржийн “Төөрөгдөл”, монгол зургийн багш С.Ганзамын удирдсан магистр Гоогийн “Хорчин эмэгтэй”, монгол зургийн багш Б.Нямхүүгийн удирдсан магистр Вень Жуны “Эзэн хичээвэл, заяа хичээнэ” зэрэг бүтээлүүд АНУ-ын Вашингтон хотноо болох Дэлхийн банкны үзэсгэлэнгийн танхимд 2019 оны 5 сараас 6 сар хүртэл тавигдаж үзэгчид, уран зураг сонирхогч, шүүмжлэгч, судлаачдын нүдийг хужирлахаар болжээ.
Т.Соёл-Эрдэнэ (Удирдсан багш Ө.Гандулам) “Амгалан сүм”. 2015. 110х140. Зотон тос
Б.Баярхүү (Удирдсан багш Н.Нармандах) “Сахиус хөлөглөгч” 2016. 180х90, Даавуу, Гуашь
А.Иснил (Удирдсан багш Монгол зургийн багш Н.Нармандах) “Галын тахилга” 2016. 150х100, Даавуу, Гуашь
Гоо (Удирдсан багш С.Ганзам) “Хорчин эмэгтэй” 2017. 120х80, Даавуу, Гуашь
Вень Жун (Удирдсан багш Б.Нямхүү) “Эзэн хичээвэл, заяа хичээнэ” 2017. 150х150, Даавуу, Гуашь
Г.Сандагдорж (Удирдсан багш Н.Нармандах) “Төөрөгдөл” 2017. 90х150, Даавуу, Гуашь
Шалгарсан уран бүтээлчид, удирдсан багш нартаа баяр хүргэж, амжилт хүсье.
