Сонгодог урлагийн олимп буюу П.И.Чайковскийн нэрэмжит олон улсын уралдаанаас мөнгөн медаль хүртэж, Үндэсний их баяр наадмын өмнө Монгол Улсын гавьяат жүжигчин болсон ДБЭТ-ын гоцлооч Э.Амартүвшин энэ сарын 19-25-нд Норвегийн Осло хотноо дахин ур чадвараа сорилоо. Энэ уралдаанд оролцохын тулд 43 орны 200 гаруй дуучин материал, видео бичлэгээ илгээснээс 21 орны 52 гоцлооч эрх авсан юм.
Тэрбээр энэ удаагийн уралдааны шагналт байрт шалгараагүй ч шилдэг 10-т багтаж хоёрдугаар шатанд ая дуугаа өргөсөн байна. Өмнө нь концертмейстер Б.Солонгын хамт явдаг байсан бол энэ удаа Э.Амартүвшин ганцаараа оролцжээ. Сонгодог урлагийн хүрээллийнхний хамгийн нэр хүндтэй тэмцээнээс шагнал хүртсэн учраас олон хүн түүнийг дараагийн уралдаандаа амжилт гаргана гэсэн итгэлтэй байсан ч санаснаар болсонгүй. Гэхдээ залуу дуучны ирээдүйн амжилт үүнээс тод гэрэлтэх нь дамжиггүй.
