R&B супер од Бейонсе алдрын оргил өөд тэмүүлсэн амьдралынхаа тухай өгүүлэх баримтат кино хийхээр болжээ. Тэрбээр энэхүү баримтат кинондоо аялан тоглолт, тэр бүр олон нийтэд хүрээд байдаггүй тайзны арын амьдрал, ойр дотныхны ярилцлага гээд олон зүйлийг багтаахаар төлөвлөсөн гэнэ. Эдгээрээс гадна олны анхаарлыг хамгийн ихээр татсан нь 2011 онд реппер Jay-Z-тэй гэрлэсэн нууцлаг хурим болоод 2012 оны нэгдүгээр сард мэндэлсэн Блю Айви охины тухай байх юм. Мөн дуучин бүсгүй өөрөө киногоо найруулж, продюсерлэх ажээ.
Бейонсе өмнө нь шинэ уран бүтээл гаргахаар хэрхэн ажиллаж буй тухай өгүүлэх баримтат киногоо мөн өөрөө найруулж байжээ. Өнгөрсөн хугацаанд хөгжмийн ертөнцөөс гадна кино урлагийн салбарт ч хүч сорьж амжсан тэрбээр “Dreamgirls”, “Cadillac Records,” “Austin Powers” гэх цуврал киноны “Goldmember” анги зэрэг нэлээд олон кинонд дүр бүтээсэн билээ. Мөн Бейонсе 1954 онд бүтээгдсэн “A Star Is Born” хэмээх Америкийн мюзиклийг дахин шинэчлэх төсөл дээр ажиллахаар болжээ.
